Thursday, November 27, 2008

عيد الشكر...

عيد الشكر...

نعم هذا ما يطلقون عليه...يمكنك قراءة المزيد عن هذا العيد او بالأحرى اليوم في موسوعة ويكيبيديا
اليوم هو عيد الشكر في امريكا و كندا، لا اعلم ان كانت الطائفة المسيحية في العراق يحتفلون بهذا العيد ام لا، لك لا اعتقد...قد نرى الجواب في التعليقات؟
بالنسبة لي، كان يجب ان أقرأ عن هذا الموضوع، لإن في مناسبات كهذه، يكون هنالك دعوة للقادة العراقيين و شيوخ العشائر و الوجهاء، و بالتالي، سوف يتسآلون عن ماهية العيد و لماذا،و كيف و كل هذه الأسئلة، و بالتالي من الذي سيجيب على هذه الأسئلة؟؟؟؟؟؟؟؟؟؟؟؟ بالطبع المترجم...
الأمر جيد نوعاً ما، فقد قرأت ما يكفي عن هذا الموضوع...الطريف في الأمر، أن يوم الأحتفال هذه المرة سوف يشمل شريحة جديدة علينا...!
نعم، أنهم الصحوة،او ما يُطلق عليهم، ابناء العراق، فقد اصبحوا الآن من الأحباب و الحلفاء! فمرحباً بهم...
هنالك طرفة أخرى حصلت معي في احدى المناسبات الأحتفالية كما اسميها، أذكر مرة من المرات، ان الشيوخ كانوا مدعووين إلى احدى الولائم، طبعاً كما تعلمون، ففي المطعم الأمريكي، يوجد كل انواع الأطعمة و المشروبات، من ضمن المشروبات هذه، ما يسمى البيرة، بغض النظر عن ما يسميها البعض بيرة اسلامية او غير الأسلامية... رأيت الشيخ توجه إلى البراد و اخذ منها، فتوجهت له مباشرةً لأقول له، شيخنا، ترة هذه بيرة...و فعلاً كان الجواب رائع منه، صدمني بقوة، قال:اعرف قابل ما اعرف،اشايفنة منفتهم!!!
لكن مع الأسف لكوني لا اتعض من هذه المواقف لازلت اعمل نفس الأمر، في كل مرة، و صدق او لا تصدق الأجابة واحدة...على كولة احد اخواننا الزملاء يكوووووول: عراقي متتعض اذا مو بالرزالة متمشي، اظاهر هوة صح، زين لتسوي شين متشوف.............
خلي انشوف، هالمرة كيف حيكون عيد الشكر، و كيف هي مظاهر الأحتفال...تدرون، فعلاً احس، انه احنة وين و بغداد وين، يعني هل فعلاً احنة بنفس العراق...من اشوف هذا البذخ، أيبااااااااااااه، لو بيدي، لا اخلي الناس كلهة تشتغل ويا الأمريكان!!!شنووووووووشنووووووووووووو
اشتتكول!!!!!!!!!!!!!!!!!!!!
متا اسمع.........................
هااااااااااااااتكول :خسة، قابل كلهة عملاء مثلك.

لا لا، بهاي اوافقك بيهة تماماً، انت على حق...
ماشي يابة، اشوفك بخير،
بالمناسبة...احدى المرات في أثناء دخولي المنطقة الخضراء الساعة السادسة فجراً، تعرف كم من الوقت ظليت انتظر لحين دخولي؟!تقريباً ١٥ دقيقة.............لإن السرة كان كلش طويل............اظاهر عملاء اهواية يشتغلون بالمنطقة الخضراء إذ مو الشعب كلة...
تصبحون على خير أغاتي...
يرادنة موضوع على الشيوخ، شيبووووووووووني هذولة الشيوخ و الله.
********************
اكيد ما اكدر اختم، إذا ما ارسل رسالة خاصة، إلى العزيزة الغالية...رسائلج كلهة وصلت، و متتوقعين مدى فرحتي عندما فتحتهة، صدكيني و بدون حلفان، من ارجع من كل مهمة، اول شغلة اسويهة، اشوف صندوق الرسائل... ورة كل هذا تسأليني:اشتاقيتلي لو لا؟؟؟؟؟؟؟؟؟؟؟؟!!!!!سؤال ما إلة اجابة، لإن الأشتياق كلمة قليلة بحقج...صدكيني مكدرت اتحمل من انقطعتي عني الأيام السابقة لكن، مكان باليد حيلة، كان لازم التزم بالقرار الي اتخذتة، لمصلحتج و الله شاهد...على كل حال، هسة اشلون صرتي، اكيد زينة، ان شاء الله...زين، ليش متتسعمين موسيقى، هاي شلهة علاقة...اكيد اتطلع و بقوة إلى لقاء او مكالمة، بس بعد ما اجة الوكت المناسب لهذا...اهتمي بكل الأمور الحلوة، و تأكدي دائماً اكو امل، و اكو اصدقاء، يبحثون عن الصداقة فقط بعيد عن كل المصالح الدنيوية...فكري بهؤلاء الناس، هكذا اناس يجب ان نقتدي بهم...الحمد لله الأمور جيدة، لكن ما كل ما يتمنى المرء يدركه، رُبَ امريءٍ حتفه في ما تمناه، آني مؤمن بهذا الشي...الحمد لله و الشكر على كل شي...حالتي احسن من حالة كثير من الناس...الله يديم المحبة...اكيد يجب ان اهديلج موسيقى رائعة، اتمنى ان تتأملين بيهة:



4 comments:

Sandybelle said...

سامي, شكرا للبوست, ودائما خلي ايمانك بالله قوي, دير بالك على نفسك

Anonymous said...

لا عزيزي عيد الشكر ليس عيد مسيحي واصلا هو عيد امريكي وعلماني بذكرة وصول اول مهجرين انكليز لقارة امريكا الشمالية وبقاؤهم على قيد الحياة بعد اول شتاء في هذا الارض الجديد بمساعدة الهنود الهمر الساكنين بهذه المنطقة

ميثم الامريكي

iraqi-translator said...

شكراً على المعلومة ميثم، و ايضاً شكراً للعراقية...أكيد ساندي، الله يخلي الجميع بخير

Unknown said...

Actually we cook more turkeys than chickens. Turkey is the traditional meat cooked on this day. We also have stuffing, cranberry sauce, mashed potatos, sweet potatos, yams and many more dishes.